lipu 14
mun nanpa luka li nasa mute. mun ante li suli; mun ni li lili. ona li tomo taso e palisa suno e jan seli pi palisa suno. jan lawa lili li sona ala e ni: mun ni li jo ala e tomo e jan la, ona li jo e palisa suno tawa seme.
“ken la, jan seli li nasa. taso, jan lawa suli en jan pi olin ona en jan mani en jan pi telo nasa li nasa mute; jan ni li nasa lili. pali ona li nasa ala. ona li seli e palisa suno la, ona li mama e mun sin anu kasi suwi. ona li pimeja e ona la, ona li lape e mun suno anu kasi suwi. pali ni li pona lukin. ni li pona lukin la, ni li pona kin tawa jan.”
ona li kama lon anpa mun la, ona li toki tawa jan seli:
“toki! sina pimeja e palisa suno tan seme?”
“ni li toki lawa. tenpo suno pona!”
“toki lawa ni li seme?”
“toki lawa li ni: mi o pimeja e palisa. tenpo pimeja pona!”
ona li seli kin e palisa.
“taso, tenpo ni la, sina seli kin e ona tan seme?”
“ni li toki lawa.”
“ni li sona ala tawa mi.”
“sona li lili. toki lawa li toki lawa. tenpo suno pona!”
ona li pimeja e palisa.
ona li pona e lawa ona kepeken len lili loje.
jan seli li toki: “ni li pali ike mute. tenpo weka la ona li pona. suno li kama la mi pimeja e palisa suno. suno li weka la mi seli e palisa suno. tenpo suno la mi awen. tenpo pimeja la mi lape.”
“tenpo ni la, toki lawa li ante ala ante?”
“ala. ni li ike mute! tenpo pini la, mun mi li sike kepeken tenpo suli. tenpo ni la ona li sike kepeken tenpo lili. toki lawa li ante ala!”
“a?”
“tenpo ni la, ona li sike kepeken tenpo lili lili la, mi ken ala lape. tenpo ale la mi pimeja li seli!”
“ni li musi mute! tenpo suno sina li tenpo lili lili!”
“ni li musi ala. sina en mi li toki la, tenpo mun wan li tawa.”
“tenpo mun wan?”
“lon. tenpo lili lili mute li tenpo mun wan! tenpo pimeja pona!”
ona li seli e palisa.
jan lawa lili li lukin e jan ni. ona li pilin pona tawa ona tan ni: ona li pali pona e toki lawa. jan lawa lili li sona e ni: tenpo pini la, ona li tawa lili lili e supa monsi ona la, ona li kama lukin e suno weka lon tomo ona. ona li wile pona e jan pona ona:
“sina wile la… mi sona e nasin. tenpo pi wile sina la sina ken awen kepeken nasin mi…”
“tenpo ale la mi wile awen.”
ni li ken: jan li ken pali pona li ken wile awen.
jan lawa lili li toki kin:
“mun ni li lili. sina tawa lili la sina sike e ma ni. sina tawa kepeken tenpo suli la, sina awen lon suno. sina wile awen la, o tawa. tenpo suno li tenpo pi wile sina.”
“ni li pona ala. ijo ni taso li pona tawa mi: mi lape.”
“a! ni li ike.”
“ni li ike. tenpo suno pona!”
ona li pimeja e palisa.
jan lawa lili li weka li pilin: “jan lawa suli en jan pi olin ona en jan pi telo nasa en jan mani li lukin e jan ni la, ona li pilin e ni: jan ni li lili. taso, ona li jan taso pi nasa ala. ken la, ni li tan ni: ona li pali e ijo pi jan ante.”
ona li pana e kon lili. ona li toki kin:
“ona taso li ken kama e jan pona mi. taso, mun ona li lili mute. ona li ken ala tomo e jan tu…”
ona li sona e ni, li wile toki ala e ni tawa ona: ona li wile ala weka. mun ni li pona mute; ona li jo e suno weka mute mute lon tenpo suno ale!