lipu 3
mi kama sona e ni kepeken tenpo suli: ona li tan ma seme. jan lawa lili li toki e wile sona mute tawa mi. taso, tenpo ale la, mi toki e wile sona tawa ona la, ona li toki ala e wile sona mi. ona li toki e ijo ante la, mi kama sona lili kepeken tenpo mute. ni la, ona li lukin e tomo tawa kon mi (mi sitelen ala e ona; sitelen ni li suli mute tawa sona mi). ona li toki:
“ijo ni li seme?”
“ni li ijo ala. ni li tawa kon. ni li tomo tawa kon. ni li tomo tawa kon mi.”
mi pana e sona ni tawa ona: mi tawa lon kon. mi pana e sona ni la, mi pilin suli. ni la, ona li toki:
“a! sina anpa tan sewi, anu seme!”
mi toki kepeken pilin lili: “anpa.”
“a! ni li musi tawa mi…”
jan lawa lili li musi. kalama musi ona li pona kalama, li ike mute tawa mi. mi wile e ni: jan li pilin suli tawa ike mi. ona li toki kin:
“ni la, sina kin li kama tan sewi! sina tan mun seme?”
mi kama pilin e ni: toki ni li sama suno lili lon pimeja. toki ni li ken pana e sona lili ni: ona li lon ni tan seme. ni la, mi toki wawa e wile sona tawa ona:
“sina tan mun ante, anu seme?”
taso, ona li toki ala e ni. ona li tawa suwi e lawa ona, li lukin e tomo tawa kon mi.
“lon la, kepeken ilo ni la, sina ken ala kama tan ma pi weka mute…”
sitelen li kama lon insa pi lawa ona. tenpo suli li pini la, ona li kama jo e soweli len mi, li lukin e ona kepeken pilin pona mute.
ken suli la, sina pilin sama mi tawa toki lili ona pi “mun ante”. mi alasa e sona:
“jan lili o, sina tan seme? ‘tomo sina’ li lon seme? sina wile pana e soweli len mi tawa seme?”
ona li toki ala. tenpo lili la, ona li toki e ni:
“poki pi sitelen sina li pona tan ni: tenpo pimeja la, ona li tomo e soweli.”
“lon. sina pona la, mi pana kin e linja e palisa tawa sina. tenpo suno la, sina ken linja e soweli.”
toki mi li ike tawa jan lawa lili:
“sina wile linja e ona tan seme? toki sina li nasa a!”
“sina linja ala e ona la, soweli sina li weka…”
jan pona mi li musi kin:
“ona li weka la, ona li tawa seme?”
“mi sona ala. ona li tawa sinpin ona…”
jan lawa lili li toki kepeken pilin suli:
“ni li lili. ale li lili lon tomo mi!”
ona li toki kin, kepeken pilin ike suwi:
“jan li tawa lon sinpin ona la, jan li ken ala tawa suli…”