lipu 6
a! jan lawa lili o, mi kama sona e lon lili sina kepeken tenpo mute. tenpo suli la, ijo wan li pona tawa sina: suwi pi suno weka. tenpo suno nanpa tu tu la, mi kama sona e ni. suno li kama la, sina toki:
“suno weka li pona mute tawa mi. mi tu o tawa o lukin e suno weka…”
“mi tu o awen…”
“mi tu o awen e seme?”
“mi tu o awen e tenpo pi suno weka.”
mi toki e ni la, sina pilin nasa mute. sina kama sona la, sina musi tan pilin sina. sina toki:
“tenpo ale la, mi pilin e ni: mi lon tomo mi!”
lon. jan ale li sona e ni: suno li wawa lon ma Mewika la, suno li weka lon ma Kanse. jan li ken tawa ma Kanse kepeken tenpo lili la, ona li ken lukin e suno weka lon tenpo ale. ike la, ma Kanse li lon weka mute. taso, lon mun lili sina la, sina ken tawa lili lili e supa monsi sina. sina wile la, sina ken lukin e suno weka lon tenpo pi wile sina…
“tenpo suno wan la, mi lukin e suno weka mute mute mute!”
tenpo poka lili la, sina toki sin:
“a… jan li pilin ike mute la, suno weka li pona mute tawa ona…”
“tenpo pi lukin mute ni la, sina pilin ike mute, anu seme?” taso, jan lawa lili li toki ala.