lipu 11
mun nanpa tu la, jan pi olin ona li lon.
ona li kama lukin e jan lawa lili la, ona li toki “a! jan li kama li olin e mi!”
jan pi olin ona li pilin e ni: jan ante ale li olin e ona.
jan lawa lili li toki: “toki! sina jo e len lawa musi!”
“mi toki ‘toki!’ tawa jan kepeken ona. jan li luka kalama e mi la, mi toki 'toki' tawa ona. ike la, jan ala li tawa mun mi.”
“a?” jan lawa lili li sona ala.
“o utala e luka sina tu.
jan lawa lili li ni. jan pi olin ona li sewi e len lawa ona.
jan lawa lili li pilin e ni: “jan lawa suli li musi lili; jan ni li musi mute”. jan lawa lili li ni sin la, jan pi olin ona li sewi sin e len lawa ona.
tenpo lili la, musi ni li pini musi tawa jan lawa lili.
“mi wile e ni: len lawa li tawa ma anpa. ni li ken kepeken nasin seme?”
taso, jan pi olin ona li kute ala. jan pi olin ona li kute taso e ni: toki li pona mute tawa ona.
jan pi olin ona li toki: “sina pilin suli mute tawa mi, anu seme?”
“nimi ‘pilin suli mute’ li seme?”
“jan li pilin suli mute tawa mi la, ona li pilin e ni: jan ante ale pi mun ni li ike li len ike li jo e mani lili li sona lili; mi pona lukin, li len pona, li jo e mani mute li sona mute.”
“a! taso, sina jan taso lon mun ni!”
“o pona tawa mi! o pilin suli mute kin tawa mi!”
jan lawa lili li toki “mi pilin suli mute tawa sina”. ona li pilin nasa lili. “taso, ni li pona tawa sina tan seme?”
jan lawa lili li weka.
ona li pilin e ni lon tenpo pi tawa ona: jan suli li nasa mute mute.