lipu 12
mun poka li tomo e jan pi telo nasa. jan lawa lili li kama lon mun la, ona li weka lon tenpo lili. taso, tenpo ni li pana e pilin pi ike mute tawa ona.
jan lawa lili li toki: “sina pali e seme?” jan pi telo nasa li awen li toki ala. poki mute pi telo nasa li lon poka ona. poki mute li jo e ala. poki mute ante li jo e telo nasa.
jan pi telo nasa li toki kepeken pilin ike: “mi moku e telo nasa.”
“sina moku tan seme?”
“mi moku tan ni: mi wile weka e sona.”
“sina wile weka e sona seme?” jan lawa lili li pilin ike tawa ona.
“mi wile weka e sona ni: mi pilin ike mute.” jan pi telo nasa li anpa e lawa ona.
“sina pilin ike mute tan seme?” jan lawa lili li wile pona e ona.
“mi pilin ike mute tan ni: mi moku e telo nasa!”
jan lawa lili li weka li pilin nasa.
ona li pilin e ni lon tenpo pi tawa ona: jan suli li nasa mute mute kin.