lipu nanpa 15
mun ante la, mun nanpa luka wan li suli mute. jan pi tenpo sike mute li lon mun ni. ona li sitelen e lipu suli.
ona li lukin e jan lawa lili la, ona li toki wawa: “a! jan tawa li kama!”.
jan lawa lili li anpa e monsi ona lon supa pali, li awen lili. ona li tawa mute a!
jan pi sike mute li toki: “sina tan ma seme?”
jan lawa lili li toki: “lipu suli ni li seme? sina pali e seme?”
jan pi sike mute li toki: “mi jan pi sona ma.”
“jan pi sona ma li seme?”
“jan ni li sona pona e telo suli e telo linja e ma tomo e ma nena e ma pi telo ala.”
jan lawa lili li toki: “ni li sona pona. pali ni li pali lon a!” jan lawa lili li lukin tawa poka ona tawa mun. pona lukin wawa pi mun ni li sin tawa ona.
“mun sina li pona lukin. telo suli suli li lon ala lon ona?”
jan pi sona ma li toki: “mi ken ala sona.”
“a!” jan lawa lili li pilin ike. “ma nena li lon ala lon ona?”
jan pi sona ma li toki: “mi ken ala sona.”
“ma tomo en telo linja en ma pi telo ala li lon ala lon ona?”
jan pi sona ma li toki: “ni kin la, mi ken ala sona.”
“taso, sina jan pi sona ma!”
jan pi sona ma li toki: “lon. taso, mi jan tawa ala. mi wile a e jan tawa. jan pi sona ma li tawa ala, li lukin ala e ma tomo e telo linja e ma nena e telo suli e telo suli suli. jan pi sona ma li suli la, ona li ken ala musi. ona li awen lon supa pali ona. taso, jan tawa li tawa ona. jan pi sona ma li toki tawa jan tawa, li sitelen e sona ona. sona ona li pona la, ona li alasa e ni: nasin pi jan tawa li pona ala pona.”
“tan seme?”
“jan tawa li toki e lon ala la, ike suli mute li kama lon lipu pi sona ma. kin la, jan tawa li moku e telo nasa mute la, ike li sama.”
jan lawa lili li toki: “tan seme?”
“jan pi telo nasa li lukin tu. nena wan li lon ma la, jan pi sona ma li sitelen e nena tu.”
jan lawa lili li toki: “mi sona e jan. ona li kama jan tawa la, ona li jan tawa ike.”
“ken. lukin la, nasin pi jan tawa li pona la, ona li alasa e ni: ma sin pi jan tawa li lon ala lon.”
“ona li lukin e ma sin, anu seme?”
“ala. ni li pali suli, li ike mute. taso, ona li toki e wile ni tawa jan tawa: ona o pana e ijo tan ma sin. ken la, jan tawa li toki e ma nena sin la, ona o pana e kiwen suli tan ma ni.”
tenpo ni la, jan pi sona ma li kama pilin pona mute.
“taso, sina tawa tan ma weka! sina jan tawa! o toki e mun sina tawa mi!”
jan pi sona ma li open e lipu ona, li kama jo e ilo sitelen lili. tenpo nanpa wan la, jan tawa li toki la, jan pi sona ma li sitelen e toki ona kepeken ilo sitelen lili. jan tawa li pana e ijo pi ma sin la, jan pi sona ma li ken kepeken e ilo sitelen suli.
jan pi sona ma li toki: “o toki.”
jan lawa lili li toki: “a! mun mi li namako ala; ale li lili. mi jo e nena seli tu wan. nena seli tu li seli. nena seli wan li seli ala. taso, ken la, ona li seli.”
jan pi sona ma li toki: “ken la, ona li seli.”
“mi jo e kasi suwi kin.”
jan pi sona ma li toki: “mi sitelen ala e kasi suwi.”
“tan seme a! kasi suwi li pona lukin nanpa wan!”
“kasi suwi li ijo pi tenpo lili.”
“nimi ‘ijo pi tenpo lili’ li seme?”
jan pi sona ma li toki: “lipu ale la, lipu pi sona ma li suli nanpa wan. ona li awen pona lon tenpo ale. ken lili lili taso la, nena li tawa. ken lili lili taso la, telo suli suli li weka. mi sitelen e ijo la, ijo li ijo pi tenpo ale.”
jan lawa lili li pini e toki ona: “taso, nena seli pi seli ala li ken kama seli sin! nimi ‘ijo pi tenpo lili’ li seme?”
jan pi sona ma li toki: “nena li seli anu seli ala la, ni li sama tawa mi. ni taso li suli tawa mi: nena suli li lon. ona li ante ala.”
jan lawa lili li toki sin: “taso, nimi ‘ijo pi tenpo lili’ li seme?” tenpo ala la, ona li weka e wile sona ona.
“nimi ‘ijo pi tenpo lili’ li ni: tenpo kama la, ona li weka.”
“tenpo kama la, kasi suwi mi li weka ala weka?”
“weka a.”
jan lawa lili li toki insa: “kasi mi li ijo pi tenpo lili. kin la, ma ale li ike tawa ona la, ona li jo e palisa tu tu taso! mi weka la, ona li taso lon tomo mi!”
tenpo ni li tenpo nanpa wan ni: jan lawa lili li pilin ike tan weka ona. taso, pilin wawa ona li kama sin.
ona li toki: “sina la, mi o tawa mun seme?”
jan pi sona ma li toki: “o tawa mun ma. ona li pona tawa jan mute…”
jan lawa lili li weka la, kasi suwi ona li lon lawa ona.