ni la, mun nanpa luka tu li mun ma.
mun ma li mun pi lili ala! mute li lon ona: jan lawa suli ale luka luka wan (nanpa ni li jo kin e jan lawa suli pi ma Apika), en jan mute mute mute luka luka ale pi sona ma, en jan mani mute mute mute mute luka luka ale ale, en jan luka tu ale mute mute luka luka ale ale pi telo nasa, en jan tu wan ale luka luka wan ale ale ale pi olin ona. jan suli mute ale ale ale ale li lon ona.
mi wile toki e suli pi mun ma tawa sina la, mi ken toki e ni: tenpo weka la, jan li jo ala e wawa suno la, jan seli luka wan ale mute luka ale luka luka wan o pali lon ma suli ale pi mun ma.
sina lon weka la, ni li pona lukin. lukin la, pali pi jan seli li sama tawa musi. nanpa wan la, jan seli pi ma Nusilen en jan seli pi ma Oselija li seli e palisa suno ona. ona li pini seli la, ona li kama lape. tenpo poka pi tawa musi la, jan seli pi ma Sonko en jan seli pi ma Sipi li seli. pini la, ona kin li weka. ni la, jan seli pi ma Losi en jan seli pi ma Palata li kama. tenpo poka la, jan pi ma Apika en jan pi ma Elopa li kama. tenpo poka la, jan pi ma Amelika seli li kama. pini la, jan pi ma Amelika lete li kama. tenpo ala la, ona li pakala e nasin pi tawa musi. ni ale li pana e pilin wawa.
lon poka sewi pi mun ma la, jan seli li wan. jan sama ona li lon poka anpa pi mun ma, li wan. ona tu taso li pali lili lili, li lape lon tenpo mute. tenpo sike wan la, ona li pali lon tenpo tu taso.