lipu 23
jan lawa lili li toki “toki!”
jan esun li toki “toki!” jan esun li esun e moku ilo ni: tenpo suno ale la, sina moku e moku ilo ona wan. ni li weka e wile sina pi moku telo.
jan lawa lili li toki: “sina esun e ni tan seme?”
jan esun li toki: “moku ilo ni li pona tawa tenpo sina. jan sona li kama sona e ni kepeken nanpa: sina moku e ona la, tenpo sina li kama suli pi mute mute mute luka luka tu wan.”
“mi pali e seme kepeken tenpo sin ni?”
“sina ken pali e pali pi wile sina.”
jan lawa lili li toki: “tenpo mi li suli sama ni la, mi tawa ma telo lili kepeken tenpo suwi…”
