mi lon ma pi telo ala la, tenpo suno luka tu wan li pini. jan lawa lili li toki e toki pi jan esun tawa mi la, mi moku e pini pi telo ale mi.
mi toki: “a! toki sina li pona mute! taso, mi pini pona ala e tomo tawa kon mi. mi jo ala e telo. mi ken tawa ma telo lili kepeken tenpo suwi la, mi pilin pona mute kin!”
“soweli loje mi li…”
“tenpo ni la soweli loje li lili!”
“ni li tan seme?”
“telo li lon ala la, mi tu li kama moli…”
toki mi li nasa tawa ona. ona li toki:
“jan pona mi li pona tawa mi lon tenpo ale. mi kama moli la, jan pona li pona tawa mi lon tenpo ni kin. soweli loje li pona mute tawa mi…”
mi pilin e ni: “ona li sona ala e ike suli pi tenpo ni. ona li moku lon tenpo ala. ona li wile e suno lili taso…”
ona li lukin e mi la, ona li sona e pilin mi. ona li toki:
“mi wile kin e telo. mi tu o alasa e lupa telo.”
ike la, mi sona e ni: mi alasa e lupa telo lon ma pi telo ala la, ni li nasa mute. ma ni li suli mute. taso, mi tu li open tawa.
tenpo suli la, mi tu li tawa. toki ala li lon. pimeja li kama la, mun suno li kama seli. sijelo mi li pilin nasa tan telo ala la, mi lukin e mun suno sama ni: ona li lon ala, li lon lawa mi taso. toki pi jan lawa lili li tawa musi lon lawa mi.
mi toki: “ni la, sina wile moku kin e telo, anu seme?”
taso, ona li toki ala tawa wile sona mi. ona li toki taso:
“telo li pona tawa pilin kin…”
mi sona ala e toki ona. taso, mi toki ala… mi sona e ni: mi o toki ala e wile sona mi tawa ona.
jan lawa lili li kama pilin lape, li awen. mi awen kin lon poka ona. tenpo suli la mi tu li toki ala. ona li toki:
“mun li pona lukin tan ni: kasi suwi li lon mun wan. taso, jan li ken ala lukin e ona.”
mi toki: “lon.” mi lukin e ni: mun li suno e nena pi ko kiwen.
ona li toki kin: “ma pi telo ala li pona lukin…”
toki ona li lon. tenpo ale la, ma pi telo ala li pona tawa mi. sina awen lon nena pi ko kiwen. sina lukin e ala. sina kute e kalama ala. taso, lon kalama ala la, pilin suno li lon…
ona li toki kin: “ma pi telo ala li pona lukin tan ni kin: sina lukin pona la, lupa telo li lon.”
nasa la, mi kama sona e pilin suno pi ma ni. tenpo pi mi lili la, tomo mi li ni: jan li mama e tomo lon tenpo pini suli. jan li toki e ni: ijo suli pi mani mute li lon anpa tomo. lon la, jan ala li kama jo e ijo ni. jan ala li alasa e ijo ni. taso, ijo suli ni li pana e pilin pona tawa tomo. lon pilin pi tomo mi la, ijo suli li awen…
mi toki tawa jan lawa lili: “lon. tomo mi, en mun suno, en ma pi telo ala la, oko li ken ala lukin e pona ale ona a!”
“ni li pona tawa mi: sina pilin sama soweli loje mi.”
jan lawa lili li kama lape la, mi kama jo e ona lon luka mi, li tawa kin. mi lukin e ona la, pilin mute li lon sijelo mi. mi pilin e ni: mi jo e ijo suli pi wawa lili. lon ma la, ale li wawa; ona li lili. suno mun la, mi lukin e sinpin walo ona e oko pini ona. linja lawa ona li tawa lon kon. mi toki insa: “mi lukin e selo taso. oko mi li ken ala lukin e pona ona pi suli nanpa wan.”
uta ona li open lili, li sama uta lili pi pilin pona. mi toki insa kin: “mi lukin e jan lawa lili lape la, pilin mute li lon sijelo mi tan ni: ona li olin e kasi suwi. kasi suwi li pana e pilin suno lon lawa ona. ona li lape la, pilin suno li sama seli pi ilo suno.” ni la, mi kama pilin e ni: ona li wawa pi lili mute. jan o awen e ilo suno; kon li ken moli e ona…
mi awen tawa la, mi lukin e lupa telo lon tenpo pi suno kama.